KITAABKA DAHAARADDA

NIFAASKA :
Nifaasku waa dhiigga umulaha ka yimaada haddii ilma nool, mid bakhti ah ama mid aan dhamays ahayni uu dhasho intaba. Muddadiisa: Dhiigga noocan ah isaguna ma laha muddo la odhan karo waa muddada ugu yar ee u xadidan. Wuxuu joogsan karaa isla markiiba, ama umulaha qaarkood dhiigba kama yimaado. Sidaas darteed, kuwaasi waa inay tukadaan, soomaan iwm., iyagoo ka tilmaan qaadanaya hadba xaaladdu siday tahay. Waqtiga ugu dheer ee culimadu sheegatay inuu dhiiggaasu socdona waa afartan maalmood. Ummu Salamah waxa laga soo weriyey inay tidhi: “Cahdigii Rasuulka Salallaahu caleyhi wasalam umuluhu waxay fadhiyi jireen afartan maalmood.” (Shanta Imaam ayaa soo weriyey an-Nasaa'i mooyee).
At-Tirmidi oo Xadiiskaa ka faalooday wuxuu yidhi: Asxaabtii Nebiga Salallaahu caleyhi wasalam kuwoodii ahlul cilmiga ahaa iyo Taabiciintii ka dambeeyay waxay isku waafaqeen in haweenka umulaa ay afartan maalmood salaadda ka joogaan. Haddii afartan maalmood ka hor dhiiggu ka joogsado umushu way maydhanaysaa (qusul) isla markaana tukanaysaa. Haddii ay waxoogaa dhiig ah aragto afartanka maalmood ka dibna, culimada badankoodu salaadda in aan la joojin ayay qabaan.

• Prev
• Next