GAGABAYSIGU WAA ARRIN KHAAS U AH UMMADDA NEBI MUXAMMAD

GAGABAYSIGU WAA ARRIN KHAAS U AH UMMADDA NEBI MUXAMMAD:
Xadiis laga soo weriyey Jaabir bin Cabdullah wuxuu Rasuulku Salallaahu caleyhi wasalam yidhi: “Waxa Ilaahay I siiyey shan aanu cid iga horaysay siinin. Wuxuu Ilaahay guusha igu siiyaa baqdin cadawgaygu iga baqo markaan u soo jiro meel bil loo socdo. Dhulkana waxa la iiga yeelay Masjid iyo dahaarad, qofkii Ummadayda ka mid ahi waa inuu markaa ku tukado meeshii ay salaaddi ugu soo gashaba. Maalka (qaniimadda) dagaalka lagu furtana Ilaahay wuu ii xalaaleeyay, taas oo ah arrin aan cid iga horeysay loo xalaalaynin. Shafaacadana waa la ii ballanqaaday. Nebi walba waxa gaar ahaan loogu soo diray qawmkiisa (Ummaddiisa) oo keliya, anna dad oo dhan ayaa caam ahaan laysoo diray.” (Al-Bukhaari iyo Muslim ayaa soo weriyey).
Sababta loo sharciyeeyay: Caa’isha (Ihkra) waxay tidhi: “Rasuulka Alle Salallaahu caleyhi wasalam ayaanu u raacnay safar ka mid ah safaradiisii. Markaanu meesha Baydaa’ la yidhaahdo gaadhnay ayuu shuuli aan gashanaa iga go’ay. Markaasuu Nebigu Salallaahu caleyhi wasalam kacay oo uu raadiyey, dad kalena la kaceen oo ay raadiyeen iyagoo aan weysa qabin biyana aanay haysanin. Dadkii ayaa Abuu Bakar u yimi oo ku yidhi: Miyaanad arkayn waxay Caa’isha fashay. Abuu Bakar ayaa ii yimi iyadoo Nebigu Salallaahu caleyhi wasalam uu dhabtayda ku jiifo oo uu hurdo. Markaasuu I canaantay oo igu yidhi wixii uu Alle u idmay inuu yidhaahdo, oo waliba uu dhinaca iga gujiyay, manaan dhaqaaqi karaynin waayo Rasuulka Salallaahu caleyhi wasalam ayaa dhabtayda ku jiifay. Rasuulku Salallaahu caleyhi wasalam wuxuu hurday ilaa uu waagi beryay isagoo aan weysa qabin. Markaasuu Ilaahay soo dejiyay Aayadda gagabaysiga (An-Nisaa’: 43). Asiid bin Xadiir wuxuu yidhi: Tani maaha barakadii ugu horaysay ee la idinka helo reer Abuu Bakarow! Caa’isha waxay tidhi: Awrkii aan saarnaa markii la kiciyey ayaanu hoostiisa shuuligii ka hellay.” (Jamaacada ayaa soo werisay at-Tirmidi mooyee).