WAQTIGA DUHURKA

WAQTIGA DUHURKA :
Labadaa Xadiis ee aan kor ku soo sheegnay waxay caddaynayaan inuu salaadda Duhur waqtigeedu bilaabmo markay cadceeddu dhinaca galbeed u yara dhaafto cirka badhtantiisa, ilaa inta shay walba dhererkiisa iyo hadhkiisu ay is le'kaanayaan. Haddii ay aad u kulushahay waxa bannaan in salaadda dib loo dhigo intay yara qaboobayso, si aan dadka khushuucu uga lumin salaaddana aan loo dedejin. Anas waxa laga soo weriyey inuu yidhi: “Haddii ay aad u qabowdahay Rasuulku Salallaahu caleyhi wasalam salaadda Subax goor hore ayuu tukan jiray, haddii ay maalintu aad u kulushayna salaadda Duhur dib ayuu u yara dhigi jiray intay qaboobayso.” (Al-Bukhari ayaa soo weriyey).
Sidoo kale, Waxa laga soo weriyey Abuu Darr (Ihkra) inuu yidhi: “Mar aanu safar u raacnay Rasuulka Alle Salallaahu caleyhi wasalam oo uu Mu'adinki u kacay inuu addimo ayuu Rasuulku ku amray inuu u kaadiyo Eedaanka ilaa intay qaboobayso. Mar labaad markuu isku deyay inuu haddana addimo wuxuu Rasuulku Salallaahu caleyhi wasalam ku celiyay laba ama saddex goor u kaadi ha qabowdee, ilaa aanu aragnay hadhkii gumburaha (taagagga dhulka) oo soo rogmaday, kolkaasuu haddana yidhi: Kulaylka laxaadka badani waa bukhuurkii (neefsashada) Naarta, haddii ay aad u kululaato salaadda u kaadiya intay qaboobayso.” (Al-Bukhaari iyo Muslim ayaa soo weriyey).
Intee dib loo dhigayaa: Imaam al-Xaafid wuxuu ku sheegay kitaabkiisa Fatxul-Baari in ra'yiga culimada ee xadidaya inta salaadda Duhur dib loo dhigi karaa uu kala gedisan yahay. Culimada qaarkood waxay yidhaahdeen waxa dib loo dhigayaa salaadda Duhur ilaa inta shay walba uu hadhkiisu dhudhun qof le'ekaanayo. Qaarna waxay yidhaahdeen ilaa inta hadhku dhererka shaygaa rubucii le'ekaanayo, qaarna nus ama saddex daloolow hal dalool (1/3) iwm,. Hase ahaatee, waqtigaasu wuxuu ku xidhan yahay kulaylka laxaadkiisa, lamana ogola in salaadda dib loo dhigo ilaa intuu Casarku soo gelayo ee waa in Casar ka hor la tukado.