SHAFEECO (GARAB SIIN)

Alle weyne kor ahaaye wuxuu yiri:

107. “Kii garabeyn wanaagsan garbeeya ajar buu leeyahay” Suuradda An-Nisaa: Aayadda 85.

246. Abuu Muusa Al-Ashcari (A.K.R.) wuxuu yiri: Mar kastoo qof dan leh uu u yimaado nabiga (S.C.W.) wuxuu weydiin jirey ragga la fadhiya, oo ku oran jirey: “Garab siiya oo gacan ka geysta arrintiisa ajar baad ka helaysaane (xag Alle). Allena wuxuu ku guddoominayaa carrabka nebigiisa (S.C.W.) wixii uu doono”. (Bukhaari iyo Muslim)

247. Ibn Cabbas (A.K.R.) wuxuu sheegay isagoo ka hadlaya khilaafkii iyo murankii ka dhex dhacay Bariira iyo ninkeeda, in Nebigu (S.C.W.) ku yiri Bariira: “Way wanaagsanaan laheyd haddii aad ku noqotid ninkaaga. Waxay tiri: Rasuul Alloow, Ma talo iyo kala dhexgalid bay ka tahay mise waa amar? Wuxuu ku jawaabay: Mayee waa iga asxaanfal iyo kala dhex galid, waxay tiri: Ma aan rabo”. (Bukhaari)