MAXAA BANAAN IN LA SAMEEYO MAALINTA CIIDDA ADXAA ?

Waxaa sharci ah maalinka ciidda adxada – carrafo – qofka aan xaajiga ahayn wax kasta oo la jideeyey maalinta ciidda fidarka, aan horay ugu soo xusnay ( bogga 153 ) marka laga reebo sakada fitarka waayo waxay ku gaar tahay ciidda fidarka oo keliya.

Waxaana ku gaar ah ciidda adxada -Carrafo- in diintu dhiirra gelisey oo lagu helo ajar badan gowraca udxiyad u dhowaansho xagga Allaah darteed.

Udxiyada: Oo ah waxa la gowraco ee ah geel ama lo’ ama ari u dhowaansho Allaah darteed maalinka ciidda adxada kaddib salaadda cidda ilaa qorrax dhaca maalinka seddex iyo tobnaad ee bisha Dul Xijjah -Carafo- Allaah Kor ahaaye wuxuu yiri:
“Ee u tuko Rabbigaa darti, oo u gowrac (xoolaha ugu dhowaansho Isaga Keliya) (Al-Kowthar: 2)
Waxaana lagu fasiray salaadda ciidda iyo udxiyada.

Xukunkeeda: waa sunno lagu adkeeyey qofkii awooda, wuxuu ka gowracayaa muslimka naftiisa iyo reerka gurgiisa.

Waxaana sharci ah qofkii doonaya inuu udxiyo qalo inuusan waxba ka goyn timahiisa, iyo ciddiyahiisa iyo oogadiisa laga billaabo maalinta koowaad ee bisha Dul Xijjah ilaa gowraca udxiyada.