KITAABKA SALAADDA

DUCADA EEDAANKA DABADII:
Waqtiga Eedaanka iyo Iqaamada u dhexeeya ducadu waa maqbuula sidaas awgeed waxa habboon in ducada la badsado. Anas bin Maalik waxa laga soo weriyey inuu Rasuulka Alle Salallaahu caleyhi wasalam yidhi: “Ducada Eedaanka iyo Iqaamada u dhexaysa lama soo celiyo.” (Abuu Daa'uud iyo an-Nasaa'i ayaa soo weriyey iyo at-Tirmidi oo yidhi waa Xadiis xasan Saxiix ah). At-Tirmidi wuxuu ku daray Xadiiskaa inay Asxaabti weydiiyeen Rasuulka Alle
Salallaahu caleyhi wasalam :Maxaanu kolkaa yeelaa Rasuulkii Allow? Wuxuu yidhi: “Alle waydiista cafwi (dembi dhaaf) iyo caafimaad If iyo Aakhiroba ah .”

Cabdullah bin Camr (Ihkra) wuxuu sheegay inuu nin ku yidhi Rasuulka Alle Salallaahu caleyhi wasalam:Rasuulkii Allow mu'adiniintu way naga fadli bateen. Wuxuu Rasuulki Salallaahu caleyhi wasalam yidhi: “Dheh waxay leeyihiin, markaad dhamaysana ducayso waad heliye.” (Axmad iyo Abuu Daa'uud ayaa soo weriyey).
Al-Albaani wuxuu tilmaamay inay Xadiiska intiisa dambe ay daciif tahay.

Sahal bin Sacad isaguna wuxuu sheegay inuu Rasuulka Alle Salallaahu caleyhi wasalam yidhi: “Laba lama soo celiyo: Ducada Eedaanka iyo ducada waqtiga Jihaadka markay ciidamadu is guda galaan.” (Abuu Daa’uud ayaa soo weriyey sanadkiisuna waa Saxiix).

• Prev
• Next